葛珮帆去维也纳睇垃圾？

葛珮帆趁假期去维也纳参观废物处理设施

今日时报网12月31日讯 （记者 龚学鸣）立法会最近休会，有立法会议员就趁放假去个旅行轻鬆吓，但係民建联葛珮帆（EQ）就选择出外考察，重要係去奥地利维也纳参观废物处理设施添。EQ话，维也纳主要以焚化方式处理废物，转废为能嘅技术十分成熟，值得香港参考。

原来EQ今次参观嘅焚化设施，已经运作咗10年。佢话，自己响现场完全闻唔到有臭味，当地政府同民间亦都一直有监察空气指数，未有发现空气被污染。呢种废物焚化设施，响维也纳就有三个，全部距离市中心只有30分钟车程以内，足够处理当地超过170万居民所产生嘅废物。而焚化设施所转化嘅电力除咗能够自给自足，亦为2万5千户家庭提供电力，同埋响冬季为附近5千500个家庭提供暖气。

EQ话，焚化只会产生少量唔能够再用嘅灰烬，以堆填嘅方式处理，唔驶浪费大量土地兴建堆填区。但香港单係讨论兴建焚化设施已经用咗20年，千辛万苦落实兴建嘅焚化设施都要响7、8年后先至落成，搞到依家都仲要继续以堆填方式处理废物，连EQ都忍唔住讲句，香港实在太落后喇。