大嘥鬼交成绩表 废物多咗好伤心

图：「大嘥鬼」寻日响Facebook发帖，分享自己嘅「成绩表」，话自己嘅整体成绩退步咗

作为环保署嘅吉祥物、负责向公众推广「惜食文化」嘅「大嘥鬼」，一直深受市民欢迎，环保署仲为佢开咗个Facebook专页，畀佢同市民「交流」之余，亦可以宣传环保信息。「大嘥鬼」寻日就响Facebook发帖，分享自己嘅「成绩表」，话自己嘅整体成绩退步咗。其中，2015年都市固体废物弃置总量有371万公吨，比2014年多咗3.9%，即係每人每日大概弃置1.39公斤垃圾，搞到「大嘥鬼」好伤心，呼吁公众做好减废回收。

「大嘥鬼」又话，当中纸类废物大幅增加咗17%，「唔通同大家成日上网买嘢，积积埋埋好多包装纸盒又唔去回收有关⁈」有网民就留言话，见到好多网购或内地到港嘅货物，都係用大量胶纸封住纸箱，但啲人既冇将纸箱回收，亦冇将纸箱上嘅胶纸、塑料分开回收。

不过「大嘥鬼」都有好消息公布，就係厨余废物嘅人均弃置量下跌咗8%，显示源头减少厨余同埋食物捐赠初见成效。希望香港人能够继续做好源头减废、爱护地球啦！