搭头班车 Judy囝囝未出世先兴奋

图：郭伟强（右二）与社区干事及义工使用港铁南港岛线服务，图为黄竹坑站

南港岛线正式通车，作为当区区议员梗係要见证呢个历史时刻，就连佗B有八个月嘅新民党陈家珮（Judy）都唔怕辛苦，天气咁冻晨咁早起身，陪众多南区居民同铁路迷一齐搭足两转头班车，由海怡半岛坐到金钟再搭返转头，郑晴睇见都替佢辛苦，不过Judy全程就好开心，佢话除咗可以「优先坐吓优先座」，最重要「阿囝都有份见证通车㗎！」囝囝「未出世，先兴奋」，真係够晒纪念价值！

另外，本身係南区居民嘅工联会香港岛立法会议员郭伟强都有朝早率先试搭，大讚港铁十分快捷方便，海怡半岛11分钟就出到金钟，但佢就好关注票价偏贵，南区去中西区和铜锣湾要$6.7，比收四个几嘅巴士贵一截，希望港铁未来可以推出更多优惠，惠及区内基层市民。