民建联副主席张国钧（Horace）当选立法会议员后，日日坐喺议事厅开会听反对派「拉布」，但身材竟然仲Fit过以前？秘诀原来係除咗玩剑道之外，仲定时定候去做Gym（健身）。寻日Horace仲喺中环一间健身训练中心，巧遇另一位正在操fit嘅老友，民建联副秘书长叶傲冬，双雄相遇仲孖住教练影相摆上网，等众网民「葡萄」下佢哋嘅成果。
话说一摆上网，果然好多星级「葡萄友」上钓，民建联另一名立会新丁刘国勋（Edward）就话「见到你哋嘅效果，我都想试下」，连新社联副总干事、沙田区议员李世荣都话想玩埋一份。民建联蒋丽芸仲好抵死咁喺底下留言，叫楼上两位心动不如行动，一于组团去做Gym，修身之余仲可以锻炼下体魄应付繁重嘅议员事务。
其实郑晴知道，Edward不嬲都好健康，连汽水都只会饮无糖嘅梳打水，如果跟埋Horace去做Gym，话唔定随时变成「立法会男神」？
下一篇：：司法机构踏入2017 实施一周五天工作