议员大合照 罗冠聪例迟好大牌

图：新一届立法会议员寻日喺立法会大楼内影大合照 今日时报记者黄洋港摄

新一届立法会议员寻日喺立法会大楼内影大合照，总共有61位议员出席，被DQ（取消资格）嘅青年新政梁颂恆同游蕙祯梗係冇份影，另外有七名议员未有参与，包括刘小丽、朱凯迪、郑松泰、郭伟强、陆颂雄、何启明，同埋梁志祥。至于香港众志嘅罗冠聪就迟到，搞到畀成班议员嘘爆，佢就认真尴尬啰！

尴尴尬尬摄入镜

寻日晏昼四点半，一众议员陆续抵达立法会地下大堂集合，听从秘书处同事嘅指示，排好晒位準备影大合照。正当大会摄影同在场媒体已经影够，谂住收工之际，罗冠聪急急脚赶到。成班议员见佢姗姗来迟，一致以笑声同嘘声「欢迎」呢位议会「新丁」。有议员就讲笑话，又要再麻烦大会摄影影过张靓相。之后，罗冠聪就尴尴尬尬咁摄喺民主党邝俊宇隔篱影相。

其实罗冠聪之前已经试过出席电台节目时迟到，搞到畀节目主持「温馨提示」，提下佢做议员守时好紧要。影相迟到事小，但畀人感觉就好似唔多尊重其他议员啰，希望罗议员以后能够有番多啲时间观念啦。